Fnac-ek denda guztiz berritua eta eguneratua irekiko du
Udara arte luzatuko diren obren ondoren, Fnac dendak txoko berri ugari izango ditu; besteak beste, argi naturalarekin gozatzeko irakurketa guneak. Horrez gain, kultur agenda potentea eskainiko du, hemengo zein nazioarteko kultur munduko sortzaile eta egileekin.
Aldaketa nagusia denda kontzeptu “eboluzionatu” baten sorrera izango da, bezeroaren esperientzia ahalik eta gehien hobetzea helburu duena. “Denda erabat konektatuta egongo da gure online plataformarekin; online eta dendako erosketaren artean etenik gabeko esperientzia eskaini nahi dugu. Horrela, bezeroek stocka unean bertan kontsultatu ahal izango dute, online erosi eta dendan eroso jaso, edo nahiago badute, dendan erosi eta produktua etxera zuzenean bidali. Gainera, quick commerce zerbitzuak ere izango ditugu, entrega oso azkarrak egiteko”, azaldu dute enpresatik.
Denda ez da soilik itxuraz berrituko; merkatuaren dinamika berrietara ere egokituko da. “Ingurune modernoagoa, arinagoa eta atseginagoa sortu nahi dugu, jendea deskubritzera gonbidatuko duena”, diote. Horretarako, produktuen antolaketa berriak, erosketa prozesuen optimizazioak eta teknologiaren integrazioak bezeroen nabigazioa eta aukeraketa erraztuko dituzte.
Berritze lanen helburuetako bat ere Fnac-ek Donostiako kultur bizitzan duen papera indartzea da. Espazio fisikoa aldatuko bada ere, kultur eskaintza eta ekitaldiak markaren ardatz izaten jarraituko dute. Izan ere, Fnac-ek kulturarekiko duen konpromisoa berretsi du, eta hemengo zein nazioarteko egile eta artistekin jarduerak antolatzen jarraituko duela azaldu du, bere ADN-aren parte den “kultur eragile” izaerari eutsiz.